Институти ёрдамчиёни ҷамъиятии прокурорҳо ва муфаттишони мақомоти прокуратураи Ҷумҳурии Тоҷикистон – қисми таркибии системаи мақсадноки тайёр намудани мутахассисон барои мақомоти прокуратура буда, барои андӯхтани донишҳои касбию малакаи амалии дар фаъолияти прокурорию тафтишоти ҷамъшуда, аз ҷониби ҳар яки онҳо мусоидат менамояд.

Мақсади институти ёрдамчиёни ҷамъиятии прокурорҳо ва муфаттишон – ёрӣ расонидан ба ташаккули малакаҳои таҷрибавии кормандони ояндаи прокурорию тафтишотӣ, омӯзондани татбиқи дурусти дониши назариявӣ дар фаъолияти назоратии прокуратура, аз худ кардани тарзу усули таҳлил, ба амал баровардани назорати прокурорӣ аз болои тафтиши пешакӣ ва кушодани ҷиноятҳо, истифодаи тавсияҳои илмӣ дар ташкили кор ва идора, ба фаъолияти мақомоти прокуратура дар мустаҳкам намудани қонуният ва тартиботи ҳуқуқӣ мусоидат намудан мебошад.

Вазифаҳои институти ёрдамчиёни ҷамъиятии прокурорҳо ва муфаттишон ин ҳарчӣ бештар ҷалб намудани ҷамоатчигӣ, аз он ҷумла донишҷӯён дар давраи таҷрибаомӯзии истеҳсолӣ дар фаъолияти бевоситаи прокурорию тафтишотӣ мебошад.

Шаҳрвандони Ҷумҳурии Тоҷикистон, ки дорои маълумоти олии ҳуқуқшиносӣ мебошанд, инчунин донишҷӯёни бахшҳои болоии муассисаҳои таҳсилоти олии ҳуқуқшиносӣ, ки дорои савияи дониши баланд ва одобу ахлоқи ҳамида мебошанд, метавонанд ба сифати ёрдамчиёни ҷамъиятии мақомоти прокуратура таъин гарданд.

Талабот, ҳуҷҷатҳои зарурӣ барои қабул кардан ба сифати ёрдамчии ҷамъиятии мақомоти прокуртура, тартиби қабул ва хориҷ намудани ёрдамчиёни ҷамъиятӣ, вазифаҳои онҳо, мӯҳтаво ва ташкили кори онҳоро Прокурори генералии Ҷумҳурии Тоҷикистон муайян менамояд.

  Тибқи моддаи 53 Қонуни конститутсионии Ҷумҳурии Тоҷикистон “Дар бораи мақомоти прокуратураи Ҷумҳурии Тоҷикистон” шаҳрвандони Ҷумҳурии Тоҷикистон, ки синнашон то 35 сола аст, таҳсилоти олии ҳуқуқшиносӣ доранд, забони давлатиро медонанд, хизмати ҳарбии ҳатмии муҳлатнокро адо карда бошад ва дорои сифатҳои лозимаи корию ахлоқӣ буда, аз рӯи вазъи саломатиашон ба иҷрои вазифаҳои ба ӯҳдаашон гузошташуда қодир мебошанд, ба мақомоти прокуратура ба кор қабул карда мешаванд.

   Тартиби ба кор қабул намудан дар мақомоти прокуратураи ҷумҳурӣ дар асоси фармони Прокурори генералии Ҷумҳурии Тоҷикистон муайян карда шудааст. Мутобиқи тартиби мазкур, шаҳрвандони Ҷумҳурии Тоҷикистон, ки муассисаҳои давлатии таҳсилоти олии ҳуқуқшиносиро хатм намудаанд ва дар асоси қарори Комиссияи тақсимоти давлатӣ оид ба тақсими хатмкунандагон ба мақомоти прокуратура тақсим гардидаанд, ба кор қабул карда мешаванд.

Комиссияи давлатӣ фаъолияти худро дар асоси Низомнома, ки бо қарори Ҳукумати Ҷумҳурии Тоҷикистон тасдиқ гардидааст, ба амал мебарорад.

Намояндаи Прокуратураи генералӣ дар ҳайати Комиссияи давлатӣ ҳангоми тақсим намудани хатмкунандагони факултаҳои ҳуқуқшиносии муассисаҳои таҳсилоти олии ҷумҳурӣ ширкат меварзад.

  Аз ҷониби Прокуратураи генералии Ҷумҳурии Тоҷикистон бо  Донишгоҳи миллии Тоҷикистон, Донишгоҳи славянии Тоҷикистону Россия ва Донишгоҳи давлатии ҳуқуқ, бизнес ва сиёсати Тоҷикистон шартномаҳои ҳамкорӣ ҷиҳати омода намудани мутахассисони ҷавон ва кадрҳои соҳаи ҳуқуқшиносӣ ба имзо расонида шудаанд.

    Шахсоне, ки аз рӯи ихтисосашон таҷрибаи кофии амалӣ надоранд, дар мақомоти прокуратура ба мӯҳлати як сол коромӯзӣ мекунанд.

    Дар мавридҳои истисноӣ, Прокурори генералии Ҷумҳурии Тоҷикистон ҳуқуқ дорад барои кӯтоҳ намудани мӯҳлати коромӯзӣ ё аз коромӯзӣ озод кардан қарор қабул намояд. Тартиби гузаронидани коромӯзиро Прокурори генералии Ҷумҳурии Тоҷикистон муайян мекунад.

    Шахсоне, ки бори аввал ба вазифаи прокурор ва муфаттиши прокуратура таъин мешаванд, савганди корманди прокуратураро ёд мекунанд.