Материалы

Ҷаласа бо иштироки Прокурори генералии Ҷумҳурии Тоҷикистон

Бо мақсади иҷрои дастуру супоришҳои Асосгузори сулҳу ваҳдати миллӣ- Пешвои миллат, Президенти мамлакат муҳтарам Эмомалӣ Раҳмон дар самти таҳким бахшидани корҳо ҷиҳати таъмини амнияти ҷомеа, рафти омодагиҳо ба даъвати баҳории ҷавонон ба хизмати ҳарбӣ, пешгирӣ аз ҳодисаҳои коррупсионӣ, терроризму экстремизм, шомилшавии ҷавонон ба ҳизбу ҳаракатҳои ифротӣ ва ғайраҳо мулоқоти гурӯҳи кории Ҳукумати Ҷумҳурии Тоҷикистон дар ҳайати Прокурори генералии Ҷумҳурии Тоҷикистон Юсуф Раҳмон ва котиби шӯрои амнияти Ҷумҳурии Тоҷикистон Насрулло Маҳмудзода дар шаҳри Конибодом баргузор гардид. Дар ҷамъомад фаъолон, кормандони ҳифзи ҳуқуқ ва роҳбарони ташкилоту муассисаҳои шаҳрҳои Конибодому Исфара иштирок доштанд.

	Ҷамъомадро муовини Раиси вилояти Суғд Даврон Зоҳидзода ифтитоҳ намуда, мӯҳтавои мулоқотро ба ҳозирин шарҳ дод. Дар оғоз Прокурори генералии Ҷумҳурии Тоҷикистон Юсуф Раҳмон бо баромади пурмӯҳтаво суханронӣ намуда, оид ба вазъи таъмини амнияти ҷомеа, ошкор гардидани ҳолатҳои коррупсионӣ дар хариду фурӯши замин, ҷой доштани шомилшавии ҷавонон ба ҳизбу ҳаракатҳои ифротгаро, даст задани шаҳрвандон ба ҷиноятҳои хусусияти террористиву экстремистидошта, ҳалли муаммоҳо дар самти омодагиҳо ба маъракаи даъвати баҳории ҷавонон ба сафи Қувваҳои мусаллаҳ, ҷоннок намудани корҳои тарғиботӣ ҷиҳати тарбияи ҳисси баланди масъулиятшиносиву ватандӯстӣ дар ҷомеа ва ғайраҳо бо далелу рақамҳои мӯътамад ҳарф зад. Қайд карда шуд, ки дар миқёси вилояти Суғд даст ба ҷиноятҳои хусусияти террористиву экстремистидошта 17,5% зиёд гардида, бештари чунин ҳодисаҳои номатлуб, аз ҷумла шомилшавии ҷавонон ба ҳизбу ҳаракатҳои ифротгароӣ дар шаҳрҳои Конибодому Исфара нисбат ба дигар шаҳру ноҳияҳои мамлакат зиёд ба қайд гирифта шудааст. Бахусус шаҳри Исфара дар ин масъала яке аз минтақаҳои нигаронкунанда боқӣ мемонад. 6-нафар шаҳрвандони Исфара ва 2 нафар сокинони шаҳри Конибодом бо тадриси ғайриқонунии динӣ дар хориҷи кишвар ба қайд гирифта шуда, давоми соли 2022 мувофиқи шаҳри Исфара 8 ва Конибодом 7- ҳодисаҳои худкушӣ рух додааст. Прокурори генералии ҷумҳурӣ ҳамчунин бобати паст будани корҳо дар самти тарбияи ҳарбӣ-ватандӯстии шаҳрвандон изҳори нигаронӣ намуд, ки аз ин боис нисбати 6 нафар сокинони шаҳри Конибодом ва 7-нафар шаҳрвандони Исфара бинобар саркашӣ намудан аз хизмати ҳарбӣ парвандаҳои ҷиноятӣ боз карда шудааст.

Тибқи дастури Ҳукумати мамлакат роҳбарону мансабдорон дар масъалаи сафарбаркунии фарзандонашон ба хизмати ҳарбӣ бояд пешсаф ва намунаи ибрат бошанд, ки дар ин самт шаҳри Конибодом фаъол буда, то имрӯз 17-нафар ва аз шаҳри Исфара 6-нафар роҳбарон фарзандони худро ба хизмати ватан сафарбар намудаанд.

Ҳолатҳои гирифторшавӣ ба бемории Вируси Норасоии Масъунияти Одам низ дар баъзе шаҳру ноҳияҳои мамлакат, аз ҷумла дар Конибодому Исфара тамоюли зиёдшавӣ дорад.

Ҳамин тавр Прокурори генералии Ҷумҳурии Тоҷикистон Юсуф Раҳмон ин ва дигар паҳлӯҳои ҳаёти ҷомеаро аз нигоҳи қонун ба риштаи таҳлил кашида, ҷиҳати ҳалли муаммову камбудиҳои ҷойдошта ба раисони шаҳру ноҳияҳои Конибодому Исфара, прокуророн ва фаъолони ин шаҳрҳо дастурҳо дод.

Сипас котиби Шӯрои амнияти Ҷумҳурии Тоҷикистон Насрулло Маҳмудзода ба сухан баромада, дар бораи зиёд рух додани ҳодисаҳои ифротгароӣ дар ҷомеаи ҷаҳонӣ, вазъи ҷинояткорӣ дар қаламрави кишвар ва мубориза бо он, зиёдшавии бемориҳои сироятӣ дар байни аҳолӣ ва дигар масъалаҳои ҳаёти ҷомеа ибрози назар намуд.

Дар ҷамъомад Раиси шаҳри Конибодом Абдусалом Тӯхтасунзода ва Раиси шаҳри Исфара Баҳоваддин Баҳодурзода дар мавриди корҳои иҷрошуда дар самти мубориза бо ҳодисаҳои номатлуб ва рафти омодагиҳо ба маъракаи даъвати баҳории ҷавонон ба сафи Қувваҳои мусаллаҳи мамлакат маълумот доданд.

Ҳамчунин чанде аз иштирокдорон низ оид ба масъалаҳои баррасишудаи ҷаласа андешаҳои худро иброз дошта, дар роҳи неку ҳамида ва дар руҳияи худшиносиву ватанпарастӣ тарбия намудани наслҳои ҷавони ҷомеаро рисолати аввалиндараҷаи аҳли зиё ва фаъолон арзёбӣ намуданд.

Маҷалла

Материалы

Ҷаласа бо иштироки Прокурори генералии Ҷумҳурии Тоҷикистон